Psalms 104
Leemi Asu Ri Laradi Runtudum Li
1Labalak, una emi asu mi Leeme Silok! O Leeme Silok, Moroa rak, u silok aleng! Ung sigaara mi lolos la lisisinang. 2U bom u mi laxasep. Uga rep asala laxalibet ngan ta loogu kadis 3la uga vaxaru loogu silok tu ro mavana at ladan ik lok tovana. La ut kis to mavana at lengkon takabu ngan lagengen taram la lamanman it mas aonon u. 4Uk lok laramera manman di ngan luvuttadi loklok ka linga ram la laxao at lavanga i mam i lok ngan lavasaxaruki ram.5Ugara vaxaxis li atmatkun pam lavatkangka to vana at lamkumkun teren, la ixo epovo do tara na ut asi bok ba i. 6Uga lok li laras to mavana ren ngan labantamon, la ladan gak mit lempat kaana. 7At loxonaleng uga musak laradan, diga sixiro; diga ekakala oo at loxonaleng diga ronga levelinga lolos taram. 8Digam tem soobang su boro vana at lempat kaana la uto xopok at larasa, ugo ap mo loxot nenu uga lok li i xusu ridi. 9Uga lok li lapdopdo mo nedi di noxo los polo i, tik lok pe di xusu di noxo sak pava bok ba lavatkangka.
10Uga lok levempuuvut dan i sesen to at larasa, la lempat dan silok ik sixit (i sesen) kantubu at levengkaana. 11Dik lox asuusu levendan ti levempanga sio mi lavanuet kangkedek atdi; laxan dongki sio dik lox axap lanminu atdi go. 12La lavapixa dip kip levempotpos atdi, go at larauna at larasigege dan la dirak pixan.
13La uk lox asu larakabu boro vana at laxalibet uto vana at lengkong kaana, la lavatkangka i unumsu mi leveloklox anarong taram. 14Uk lox asuusu levempivilis ti laxan bulumaxao la levenuna ri luvuttadi rik lok lempanga, la kusu luvuttadi dibat lotlo bok leveluxa ridi, 15la dinak lox asuusu leven vaen tik lox amomo di, la levenmonok dan olip nabak lox aklek di, la lengkong kide nabam taba di mi lolos.
16Laxanbet it pot solo at lempar una sida ro Lebanon, mo laxanuna at Leeme Silok axa gatlo li di. 17La lavapixa dik lok laraugu atnedi go; la lempatboxon dip kip levempotpos atdi ro at larauna kaao (fir tree). 18Laxanme sio dik lok to vana rubu at lempatkaana, la lempat pusi sio di lipe ro xeneng at lempat buang.
19Uga rudum li lagaaling kusu rik lok katling leven gaaling; la laxangking ikleklen loxonaleng teren ti lotup. 20Uga lok laxanimin, la keneng ap mo lamain, laxampanga sio axap dip tava su. 21Leven laion maxat di booro at loxonaleng di puse luxa, di puse ri mo levempanga anan no ne Moroa im taba i. 22La do laxangking na rip su, dimlomlong la dirak midi ro at lempatmamara atdi. 23Melemu limixin dip tavasu xusu rik lok leven gugu atdi la dira gugu abung tino.
24O Leeme Silok; ugara lok pam laxampanga solo! La uga lok di mi lakleklen, do! Lavatbung menemen i umsu mi laxampanga vipis axap taram. 25Pen ba mo laras, i silok tinotno la ip teplas, mo lara met panga vipis silok la lixilik ua ataxo epovo ri exes i, di nemen teren. 26La lempattaaxup di sesen to vana ren, la mo lavatpanga sio boro at laras, ne Levietan no nenu uga lox i, i gosogos go xeneng ap mo laras.
27Nedi axap na di nuunu li ram kusu unabam taba luxa di mo do dinak toxo. 28Nu um taba luxa di la di vanan i; nenu um taba leveluxa xusu rik lox axap lavavara atdi. 29Mo do u raba arulu di, dik marat; mo do una lok pes lamamas taram atdi, di remet la diramlomlong ti laxakup no nedi diga ravasu ren. 30Ketla do u rudum nedi mi lamamas, u raba di mi lamamas; la u raba lorooro maxat ti limixin at na lavatbung menemen.
31Keke lisisinang at Leeme Silok naba nemen amisik! Keke Leeme Silok na momo mi lempanga neni ga rudum pam i! 32Neni i reven tooro lavatbung menemen la lavatbung menemen ing nengne; neni inglong tu at lempat kaana, la dirap kip soobang asu lusuxa.
33Anabak pixan ti Leeme Silok keneng at lorooro axap tarak; at levenaleng nia ana rooro ren, anabak pixan emi asu ri ne Moroa rak. 34A vara i do ni naba momo at lengkom pixan tarak, atla leklek tarak i laala boro ren. 35A vara i xusu diba sele utut kepe luvuttadi dik lok laxapmek uto basinge lavatbung menemen; la boxopmen bok ba timixin kapmek.
Labalak, una emi asu mi Leeme Silok!
Una emi asu mi Leeme Silok!
Copyright information for
MMX